هويتنا في طريقها إلي الهلاك.....

     بسم الله الرحمن الرحيم....أتمني أن تكونوا جميعا بخير و كده يعني :) .....طيب هأتكلم  إن شاء الله عن هويتنا..... بطاقه تعريفنا يعني... أه طيب اللي هو أيه برضه !!! طب نفكر سوا ....هي أيه أصلا بطاقه التعريف دي ؟هي الوثيقه اللي بتفرقك عن غيرك أو بمعني أصح بتبين أنك "مختلف" و بتعرف الناس أنت مين.....تخيل لو كده لو تخليت عنها .....أيه اللي هيحصل ؟ ببساطه شديده مس هتقدر تثبت أنت مين مش هتقدر تثبت أنك مختلف و للأسف ده اللي أحنا بنعمله في هويتنا و هي "اللغة العربية"  

Kolna bela istsna2 bnktb b el taree2a eli ana baktb beeha dlw2ty deeh w hya el (Franco)......ثانيه كده!! فرانكو بجد؟....طب إحنا عملنا الفرانكو ده ليه أصلا؟...آه قولتولي عشان الشات و كده....هي أصلا فكرة متاخده من أوروبا كالعاده يعني ....طب بزمتكوا عايزين تقصروا الكلام مش المفروض تخلووه نفس اللغة ولا هو إنجليزي وخلاص!!..عارفين ياريتها جت علي مصر بس لا لكن ده أغلب الدول العربية بقي عندها فرانكو!!...بالرغم من إن الفرانكو ده بيدل علي أن اللغة العربية لغة "مختلفة" في حد ذاتها لأنها اللغة الوحيده اللي اتكتبت بنفس الصيغة و المعني بظبط لكن بحروف  وأرقام من لغة أخري مختلفة تماماً إلا إنه للأسف انتهاك لهويتها كلغة ربنا مكرمها!...حقاً ماذا حل بنا أأصبح من السهل علينا أن نفعل هكذا بلغة القرآن؟أهكذا نودي بلغة المعجزات؟فاللغة العربية هي من ضمن أندر اللغات اللائي لهن لكنات عدة وليس اثنين أو ثلاثه فقط!!لماذا نفعل هكذا في اللغز الذي حير العلماء و الأناس في الماضي وعلي مر جميع العصور؟....إنها اللغة الوحيده التي لديها كلمات بنفس الحروف و لكن بمعاني مختلفة لإختلاف التشكيل!!!....فكم من عشقً أكن لكي أيتها اللغة الجميلة....طب بزمتكوا بجد مش حرام الظلم ده...إحنا كل جمله لازم نحشر فيها كلمه إنجليزي ...إحنا حتي بقينا "بنتقرف"أما نشوف تعليق ولا أي حاجه علي مواقع التواصل... إحنا بوظنا اللغة بمعني الكلمه بقي عندنا هاشيرها و هاكريتها اعملها اديت....الخ الخ.....المشكله أن إحنا لو قلنا الحاجات دي بالعربي نحس فعلا أن فيه حاجه غلط!!بصوا بما أن الموضوع تقليد وخلاص !! بس ياريتها تقليد حتي بس أو تَطلُع لمعرفه لغة جديده و و هي الإنجليزية....لكن للأسف إحنا فرضنا الإنجليزية علي العربية!! و بوظناها بمعني أصح!! عارفين أما حاجه تفقد قيمتها ....ميبقاش ليها طعم ولا لازمه !! ناقصها حاجة دايماً بس مسلوبه!!! اهي دي طريقه كلامنا دلوقتي للأسف!!!...أنا أكيد مش ضد التعلم و التثقف للغة جديده بس كل اللي هاقوله ندي كل لغة حقها مش نفرضهم علي بعض !

متخيلين دول الوطن العربي 23 دولة ...كل دولة بتتكلم نفس اللغه بظبط بس ب23 لكنه مختلفة!! دي معجزة في حد ذاتها ....طب بلاش عارفين اللغة العربية قعدت كام سنه محيره العلماء عشان يحطولها أصول نحو و مراجع و لغه و قسموها قد أيه؟ 524 سنه في العصرين العباسي الأول و الثاني.....متخيلين 5 قرون و ربع تقريبا!!.....طب بلاش عارفين النحو أو الGrammer بتاع اللغة العربية (حسب كل لغه طبعا) فيه من أصعب و أعقد القواعد مثلا مثلا اللي بيجي بعد كلمة "حتي" ليه إعرابين مختلفيين حسب معني الجملة!! طب بلاش عارفين أن اللغة العربية ليها كذا طريقه في جمع الكلمات مثال:جمع التكسير(طريق: طرق).....الجمع من المفرد-بنشطب آخر حرف يعني-(تمره:تمر,بدعه:بدع).....ده غير جمع المذكر و المؤنث السالم و المثني لأي كلمه و غير الحالات الاستثنائيه بتاعتهم .... وغير كمان أن الكلمه كلها بتتغير مش بنضيفلها حرف ولا حاجه!! اللغة العربية كمان دايما بتربط الأفعال بالأسماء بمعني عشان تكشف عن كلمه في المعجم أو القاموس المحيط أو حتي تجيب اسم فاعل او مفعول لازم تجيب الفعل من الكلمه و تصوغوا في كذا صورة!!طب بلاش عشان عارفه زمانكوا تهتوا شويه ....طب حاجه كمان كده سهله وهي حرف الألف اللي بيكتب كدا: ا-أ-ء-إ-آ) 5 طرق!! حرف واحد بخمس طرق!!طب بلاش أغلب اللغات ليها مصدر واحد للفعل حسب الكلمه لكن من جمال اللغة العربية و تعدد لغويتها أن الكلام كله اتقسم علي 6 مصادر مختلفة مش مجرد مصدر واحد!!

هاحكي موقف بسيط حكهالونا المدرس بتاعنا ..مره قابل واحد صديقه و مكنش عربي و بعدين لقاه بيكتب كلمات عربي بس بحروف متفرقه....استغرب المدرس و سأله أنت ليه بتكتب كده ؟ قاله أنا بتعلم اللغه العربيه و عندي صعوبه أني اتعود أكتب الحروف لازقه في بعض! قاله أنا حابب اللغة لأنها مثيره لكم المفردات و قاله إنها عامله زي الهدف الصعب اللي لازم تتعب أوي عشان توصله عشان تحقق مكانه مرموقة....و قاله قد أيه هو محظوظ بلغة زي دي أشكال حروفها مختلفه بكذا طريقه و كمان لغويتها ذاخره.....شايفين إحنا أزاي ربنا منعم علينا بهديه و إحنا بنرميها!!

طبعا كلنا عارفين أن فيه حاجه اسمها اللغة الأم و هي اللغة المكتسبه اللي نشأنا عليها و هي من لسان الأم أكيد....عشان كده "المفروض" إن إحنا بنتحدث العربية بطلاقه ....طب تعالوا نشوف كمان كام سنه يا تري هتفضل اللغة زي ما هي؟هتفضل عربي زي أما اتربينا عليها يعني؟؟....للأسف ممكن الإجابه تبقي "لا" ...عشان ببساطه شديده أغلب الأمهات و الأهالي بقوا بيتقرفوا من العربي و معترفين بالإنجليزية فبيعودوا ولادهم عليها قال ايه من "بدري"....لكن لغة الأصل و كده لا مش مهم!!!.....تخيلوا كده لو الموضوع ده حصل في الماضي تفتكروا كانت هتوصلنا اللغة العربية؟ كان هيوصلنا العلم و الثقافة و الأدب الرهيب ده .....بلاش لو كان وصلنا القرآن كنا هنفهم حاجه ؟ الحمد لله أن كارثه زي دي محصلتش بس مع كل آسفي إحنا اللي بنصنع الكارثه بإيدينا دلوقتي!! 

أتعلموا يا خلق كم كرم الله هذه اللغه و كم مرة ذكرها في كتابه الكريم :)....أكثر من الخمس مرات.....فلم نقتل تلك الهديه بالبطيء؟

نعم أعي كم نحن جاحدين هذه النعمه العظيمه .....ونعم أعي أن الأجيال تتغير و التشبث باللغة الإنجليزية  أصبح أقوي ..... ونعم أعي حال أطفالنا آلان و جهلهم عن لغتهم "الأم" التي دوما يكرهها بعض الأهالي و يروا انه من العيب أن تأخذ ألسنه أطفالهم عليها في بداية نشأتهم.....نعم أعي حال شبابنا آلان و أعي هجائهم و كتابتهم "بالعافيه" لبعض الكلمات الي دوما ما تكون خطأ....نعم أعي أن "الوحدة" العربية قد اندثرت منذ سنين.... و لكن...... تبقي لغتنا الساحره هي الأمل في النجاة مره أخري :)

شكرا جدا للي قرأ/قرأت و كمل للأخر أتمني تكون المدونه آثرت فيك بجد....و هاطلب منك طلب ....لو أنت لغتك العربية الحمد لله جيده فحاول تشجع غيرك أو أصدقائك اللي لغتهم أوشكت علي الضياع.....شجعهم أولا بقراءة القرآن -بالقلب و ياخدوا مهلهم خالص- لأنه هيفرق معاهم كتير أوي .....شجعهم علي القرأة و ابتدي مثلا انك تشجعهم يبحثوا عن المعلومات الشيقه عن اللغة و بعدين بالتدريج يبتدوا يقروا كتب (حتي لو كتاب في الأسبوع بجانب كتب اللغات الآخري لأنهم أكيد مش هيهدروا حقهم) ثم يكتبوا حاجات بسيطه و حتي كلمهم  عن اللغه أديهم أنت معلومات عنها بسيطه حببهم فيها تاني..... لو اللي قرأ لغته مش أوي فمش متخيل مدي سعادتي لو قرأ/قرأت و استفاد فعلا و حاول يغير من نفسه :)

حبه آيات كده من القرآن و بعده طرائف و معلومات شيقه كده عن اللغة العربية :)

نبتدي بالآيات :)

سوره الأحقاف

سوره الزمر

طيب حبه معلومات بسيطه و طرائف كده D:

*معلومات  :)

*طرائف :)

من كتاب "كلام أبيح جدا" ليوسف معاطي

 :) سيرة لزميلتي علي تويترو خوفها علي اللغة العربية 

الحمد لله  خلصت خلاص أخيرا D: .....أكيد حقكوا تعرفوا المصادر D: هي عمتا من بعض المدرسين و كتاب المدرسه و معلومات عامه .....شكرا جدا و أتمني تكونوا لحظتوا أنا غيرت في الكلام كام مره ( فصحي-عاميه-فرانكو) عشان تعرفوا إنها لغة فعلا مخليانا "مختلفين".....شكرا جدا ليكوا .....سلام عليكم :)

الألم المعنوي.....

بسم الله الرحمن الرحيم........ذلك الصداع الشنيع الذي يؤلم....و لكن هذا ليس الصداع الذي يسبب الغثيان و الدوار ....انه صداعا من نوع اخر فيسبب لك دوار المأسي و المشاكل و غثيان الذكريات....انه ذلك الشيء المؤلم الذي يأتيك عنوه ....يأتي بدون طرق الباب....يأتي تاركا بك أبشع ألام الماضي.....ينتظر الوقت المناسب فيطرق في أوقات خلوه النفس التي طالما انت تريدها لتطمئن نفسك أن كل شيء علي ما يرام .....تتفاجئ بذلك الصداع غير محتسبا له اي حساب....فتستسلم لأفكاره السوداء التي ما دوما تقتل مستقبلك الوردي الذي ترسمه....يحركك ذلك الصداع كالدميه فتجد دموعك تنهال و أنت لا تعلم لماذا....تجد الابتسامه تحولت الي أبشع أنواع الأنين و حينها فقط تعي كم انت مخادع و كم انت كذوب ....فتعي انك لست ذلك المتفائل ولا لست ذاك الذي قادر علي تحقيق ابسط الأشياء.... بل انت شخص منغمس بأوهام نهايتها صدمه اليأس.....منغمس باحلام نهايتها سراب   يفاجئك انه فشل ...فيأتي الصداع مذكرك بما أنت دوما تحاول انكاره.......فتبكي و تندب باحثا عن مخرج للأمل أو الرضا بما هو أقل من القليل..... تظل هكذا حتي يغرب عنك الصداع....فتتمني  بشده الا تراه مره اخري مطلقا ....بل في الحقيقه  تتمني أن يأتي لكي تسخر انت منه فتكون قد أصبحت خالي من اليأس و مجرد من الأوهام.....لا ياس لديك ولا ذكريات يملؤها الندم....تصبر و تصبر و تتحمل الصداع في كل مره مدركا ان في يوما ما ستكون انت القاضي علي ذلك الصداع بأملك و تفأولك....لا تدري متي و لكن يقينك دائما يقظ بالأمل.....

أعسر المشاكل و أبسط الحلول :))

بسم الله الرحمن الرحيم......إن شاء الله هاتكلم إنهارده عن مشكله بتواجهنا جميعاً و يارب أفيدكوا باللي هاقوله بإذن الله :))أكيد لازم

 بنقرا قرآن لأن دي حاجه ربنا أمرنا بيها و قد أيه أصلا قراءه القرآن فيها راحه وجدانيه:)) .....بسم الله الرحمن الرحيم:كِتَابٌ أَنزَلْنَاهُ إِلَيْكَ مُبَارَكٌ لِّيَدَّبَّرُوا آيَاتِهِ وَلِيَتَذَكَّرَ أُوْلُوا الْأَلْبَابِ }...... كلنا أكيد أوقات كتير بتقابلنا مشاكل في عدم الفهم زي بنقرا و خلاص .....مفيش فهم و مفيش تركيز فبنكروت و خلاص......مبدئياً ده غلط خالص .....إحنا لازم نفهم عشان نحس القرآن بقلبنا....طب نفهم إزاي؟؟؟......أقولكوا بقي .....أول حاجه تسهل الموضوع إنك تبتدي تقرا في مصحف معاه تفسير و معاني بحيث كلمه وقفت معاك تلاقيها علي طول و تبقي شايف و فاهم الكلمات ماشيه ازاي مع بعضها فتقدر تفهم الجزء أو الصفحة بالآيات اللي فيها......هات كراسه صغيره كده و قلم رصاص و ابتدي اللي متعرفوش اكتبه في الكراسه و برضه و أنت بتقرا كده ابتدي علم عالآيات و مشي بالقلم الرصاص كده عشان متسرحش خليه في إيدك و امشي بيه.....و بعدين بعد أما تخلص خالص دور علي النت أو في المعجم عن أي حاجه معني كلمه آيه مش فاهمها و يا سلام بقي لو سألت حد كبير زي جدك أو جدتك كده :)) هتاخد منهم إفاده والله ما فيه زيها :)).... و لو فيه مثلا موضوع مهم أو مثلا عايز تطلع آيه عن موضوع معين أو قصه مثلا أو هوادم للذات....حط علي طول في الكراسه ....اسم السوره و رقم الآيه و لو عايز كمان فيه زي حاجه كده بتتلزق صغيره تعلم الصفح(بتتباع في المكاتب)....إلزقها في صفحه معينه مثلا و أكتب عليها مثلا آيه عن الخمر و هكذا في كل موضوع.......برضه من الحاجات المفيده جدا تشوف من علي النت كلمه معينه ذُكرت كام مره في القرآن الكريم و تبتدي تشوف أنت بنفسك السور و الآيات اللي ذكرت فيها زي مثلا كلمه النساء ذُكرت ٢٤ مره ..  ابتدي ركز و شوف و سجل اسم السوره و الموقف مثلا اللي في الآيه و كل يوم مثلا نقي كلمه و طلعها مثلا بعدد معين من عددها الأصلي في عدد السور اللي هتقراها .....حتي حاجه هتفيدك جدا و كمان هتخلي ذهنك متفتح و عندك تركيز عالي ....ابتدي اما تقرا مثلا تحاول تحس الكلام ....تدبر براحتك خد وقت زي مأنتَ عايز .....مفيش حاجه أحلي من كده تضيع فيها وقتك.....حاول تقرا بالتشكيل ....علي صوتك و انت بتقرا و نبه نفسك لمخارج الحروف.....صدقني هتفرق والله و بتبقي زي بدايه موفقه عشان التجويد إن شاء الله :))..قال رسول الله صلى الله عليه وسلم: ((حسنوا القرآن بأصواتكم، فإن الصوت الحسن يزيد القرآن حسناً)) ...شفت بقي كمان :))...حاول تقرا مع حد ....صديقك ،أختك ،أخوك ....و ساعدوا بعض و حاولوا تبادلوا الإفادة ......برضه جرب تقرا مع حد عنده خبره أكتر منك في التجويد و التدبر .....أقراله بصوتك و محاولتك للنطق .....أسمع انتقاده ليك و معلوماته عن خفايا و معجزات في القرآن الكريم  .....هيفيدك كتير أوي و يطورك لحد أما هتيجي تقرا تاني مش هاتسمع اي نقد إن شاء الله :))......طبعا في برضه حل مفيش أسهل منه و هو إنك تستفيد من المواقع الإلكترونية بطريقه أحسن و تكتب عاليوتيوب (كيفيه تعلم تجويد القرآن الكريم) ....و من هنا هتشوف طرق التجويد و تاخده بالتدريج و براحه....لأن علم التجويد ده بحر و مليان أنواع شتي :)).....خد وقت براحتك....أنتَ كل أما تطول كل أما هو أحسن ليك لخبراتك و تطورها و بتاخد حسنات قد كده عشان بتحاول تحسن من نفسك بل و كمان بتحاول تقضي علي عجز عندك:))...قال النبي صلى الله عليه وسلم: ((الذي 

يقرأ القرآن وهو ماهرٌ به مع السفرة الكرام البررة، والذي يقرأه  وهو عليه شاق له أجران)) .....شوف أجران متخيل :))..و يكفي أنك بتتأمل و بتتمعن في معجزه زي دير بتحاول تكتشف خباياها :)) شوف ربنا هيجازيك إزاي ....يكفيك أصلا أنك بعد التدبر ده هتقدر بسهوله تستند للقرآن الكريم في كلامك مع الناس و إقناعهم و االكراسه الصغيره دي هتبقي إن شاء الله مرجِع مفيد ليك في كل حاجه من كتر مهتكتب فيها :))...شد حيلك بقي كده عايزين دكتوراه إن شاء الله :)) .....و دايما خلي معاك مصحفك و قلمك الرصاص أول أما تلاقي نفسك فاضي علي طول افتح المصحف و تدبر و سيبك خالص من عامل الوقت و إنك تطول .....كل أما بتطول كل أما بتستفادو عداد حسناتك في تزايد[و إن الحسنات تذهبن السيئات ؛)] و والله مفيه حاجه زي كده لإستثمار وقت فراغك :)).......أتمني أكون ساعدتكوا و يارب تيسر الأمور علينا كلنا :))

مصحف بالتفسير و المعاني(فيه مصاحف أحدث و أحسن): 

الورق اللي بيتعلم بيه و الكتابه حسب الموضوع(الصفحة ممكن يبقي فيها أكتر من آيه عن كذا موضوع):

هنا مثلا شفت جمله(لا يكلف الله نفسا إلا وسعها؛ ذُكرت كام مره و في خلال القراءه لو لقيتها بعلم و بأكتب و أعرف  العدد اللي ذُكرت بيه موجود في أنهي سور بظبط و برقم بقي :))

"السنه ال 16.....

Au nom d`ALLAH :)) ....Talking about that sweet awful 16 year.....It was a year of sadness and happiness.....A year of depression and Joy....A year full of thousands of lessons.....Full of regret and repent to ALLAH .....A year of discovering another hidden part of me.....A year of putting my sweet Hijab on and discovering freedom in another beautiful way...A year of realizing how bad and deceitful people are....A year of discovering how ALLAH is always there for you whatever awful sin you have done......A year of realizing the sweetness of the small things in life.....A year that stands for an important chapter in the book of  life.....A year of realizing that though there are horrible people there are also amazing ones....A year of knowing who truthfully are your"real" friends.....A year of discovering the hidden and getting the best out of the awful.....A year of regret upon stupid things..A year of endless tears and infinite smiles....A year of loosing weight from deep grief and gaining lots from truthful happiness...A year of getting deceived...A year of knowing how amazing a family is and knowing that secret love bond..and after these lots of "A" 's ....It was a year that will always be mined in my memory for changing me to who I'm today.....الحمدلله

ثلاثيه "نصف المجتمع"....جزء واحد( إزاي بقينا كده)

بسم الله الرحمن الرحيم......هاتكلم إن شاء الله عن موضوع علي قد ما هو مهم علي قد ما ناس كتير مش واخده بالها منه.....و هو "البنات في هذه الأيام".... حد شايف أغلب البنات بقت إزاي .....حد شاف أخلاقهم...لبسهم طيب و تصرفاتهم!!....حد يتخيل أن دول اللي الرسول-صلي الله عليه و سلم- وصي بيهم قبل أما يموت؟؟....أكيد لا ....بصوا أنا بقيت بتحصر بجد علي اللي إحنا وصلناله ....كفايه تويتر لوحده!!! بلاش....طب الهزار المستفز و البنات اللي سامحه للولاد تهزر معاها بأي شكل (ايد بقي-ألفاظ....الخ).....بقي عادي جدا الهوت الشورت و الفساتين القصيره ...آه با بنتي فيها ايه متبطلي عقد.....بقي عادي جدا اتصور مع فلان زميلي و أعامله معامله مفيش زيها يعني يكلمني عن لبسي شخصيتي يحقر مني اوكيه .....أصله أخويا يبنتي فاهمه... بطلي عقد بقي!!!.هأقول بس حديث بسيط كده ردا علي موضوع السهوكه واللبس اللي معرفش ده لبس و بيستر إزاي أصلا!! :))   قال الرسول صلى الله عليه وسلم: "صنفان من أهل النار لم أرهما بعد: قوم معهم سياط وأذناب البقر يضربون بها الناس، ونساء كاسيات عاريات مائلات مميلات رؤوسهن كأسنمة البخت المائلة لا يدخلن الجنة ولا يجدن ريحها"،..بتحرموا نفسكوا من أجمل حاجه ليه؟؟عشان أيه طيب ...حته قماش ولا تسوي!!!ليه بجد!!! موضه وكده!!!فكري كده طيب الجنه الحلوه اللي فيها ما لا عين رأت ولا تلبسي لبس مش  لبس أصلا و عيون الناس كلها عليكِ!!!...بصوا للأسف ده حال البنات اليومين دول ....طب ليه بتحقري من نفسك؟ فين شخصيتك؟ فين حياءك ؟ شكلك أيه قدام ربنا و أنتي كده!!!...عايزه تقلدي الموضه و أوروبا و كده طب ليه يعني بجد....مهي لو الموضه و التقدم و الرقي بالتخفف من الملابس كانت القرده و الحيوانات من أرقي الكائنات!!!...عارفين المشكله مش في كده أنا مش هانكر تأثير المجتمع و أن ناس كتير بتتأثر فعلا بس المشكله أن البنات نفسها ضميرها أتعدم!!! يعني ممكن بنت تصاحب  و تتهزق من ولاد و تلبس براحتها مش عشان حاجه بس عشان تحس إنها مش مختلفه مش غريبه عن الباقي عشان بس متحسش  بنظرات الجميع ليها إنها معقده!!!.....يا ستي ميتفلقوا الباقي !!!.....طب بجد ليه كده ؟؟أيه اللي وصلنا كده ليه بقينا كده؟ ليه حقرنا من نفسنا كده!!! فين الإيمان و الحياء!!!.....ده ربنا عمل سوره من أطول السور في القرآن الكريم بل و في أوله كمان باسم "النساء" شايفين ربنا مكرمنا إزاي!!!.....بلاش ....الرسول _صلي الله عليه و سلم و هو علي فراش الموت آخر حاجه كان بيقولها استوصوا بالنساء خيرا!!! متخيلين آخر كلماته و بيوصي بينا!!! طب ليه كده ده !!!! ....أنا هأقول حاجه بسيطه بجد ...أنتِ اللي بتجبري اللي قدامك يحترمك....انتِ بأدبك و عفتك ...أنتِ بحيائك و تمسكك لمباديء دينك.....غصبن عن أي حد هتتعاملي أحسن معامله....و حاجه بسيطه :))....غيري من نفسك خديها بالتدريج ...حاولي تسحبي أي عاده سيئه بالتدريج.....حطي في دماغك إن ربنا بيحبك فبيسترك و يحميكي ...أنتِ "جوهره" ....أيوه دينك مكرمك يبقي فعلا مش هتستلمي لمجتمع رجعي بسهوله....دايما فكري نفسك بكده...متحرميش نفسك من النعيم عشان شويه لبس و عادات...أنتِ ليكِ شخصيه.....إن شاء الله يتبع :))

لم أنتم هكذا يا بشر؟

بسم الله الرحمن الرحيم :)).....و ما أجمل البدايه بإسم الله العزيز :).....فسبحانه و تعالي خلقنا بشر نكمل بعضنا البعض و نستفيد سوياً.....فسبحانه خلق حواء من ضلع آدم و خلق آدم نفسه من تراب الأرض شتيَ...الخلاصه : كلنا واحد و كُلنا سواه و ما خلقنا سبحانه عبثاً....إذا لم التعجرف و التكبر؟....لم نحقر من هو أقل مننا؟؟.....لم نفعل ذلك ؟؟.....لم تلك النظرات القاتلة لمن هو معاق او مريض ؟.....لم التكبر بما منحه الله لنا مع العلم أننا سواه أمامه و انه كما منحنا شيء أعطاه لغيرنا بطريقه أخري و أيضاً كما أخذ من غيرنا شيء....أخذ مننا و لكن بطريقه أخري مختلفه....فالله  سبحانه وتعالي لا يتوصي بمن هو مظهره افضل ولا يُحقر من هو يأتي بعربه الأجره البسيطه مرتدياً ملابسً أبسط بل نحن واحد!!!بل و ذاك الشخص البسيط من الممكن أن يكون أكثر قربا إلي ربه عن ذاك ذوو المظهر أو السياره الأفضل.....فيكون البسيط في نظر ربه -سبحانه و تعالي- أحسن مائه مره وللأسف في أنظارنا نحن أقل شخصًا و نحقره!!....لم نعامل من هو يرتدي البدله ذات الماركة المشهوره و الرائحة الخلابه او الساعه الثمينة (التي يساوي ثمنها مرتب موظف بسيط شهريا و لم أبالغ اذا قلت سنوياً ) معامله الملوك و لم من الأساس يوجد تلك المصطلح "معامله الملوك"...فإسلامنا منذ فجر بدايته و حكامه و ملووكه لا يوجد في تواضعهم...في يوماً أتي مندوب من بلاد عظيمه ملكها أعظم لكي يبعث برسالع إلي عمر بن الخطاب و عندما سأل عنه أهل المدينة أشاروا له علي رجلاً نائما في الظل لا يفرق شيئاً عن عامه الشعب..فوجئ المندوب و لم يصدقهم ثم قالوا له إذاً فلتذهب بنفسك و تتأكد...و ذهب الرجل ليري عمر-بن-الخطاب مرتدياً جلباب من نفس خامه قماش الجميع بل و أصغر عليه مقاسا(لإنه كان كبير الحجم و كان لا يأخذ الا مثل الجميع من القماش)نائماً في الرمال تحت الظل..فسأله إذا كان هو الحاكم فجاوبه عمر بنعم و ما بعدها إلا أنهال من الرجل نهراً من الأسئلة عن كيف هو ملك هذه البلاد جميعاً و يجلس هكذا مثلهم جميعاً!!...فكم لروعتك أيها الفاروق ليتك معنا الآن تعلم هذه العقول المريضة التواضع و حب الغير علي حق!!....لم تقولون لكل فتاه متي سترتدي الحجاب؟متي ستحترمي دينك؟و فورا عندما تلبسه تكونوا نفس الأناس الذين يقولون لها لم العجله؟ستجلسي بلا زواج؟شبابك ضاع..ماذا دُهي لكِ؟....ولكن حقاً ماذا دُهي لعقولكم انتم أيها المنافقين!!! ..لم اختفي التواضع...لم اختفت الإنسانية ....لم الاستصغار بمهارات الغير و عقولهم....لم نُحبط من نراه أحسن مننا ونشعره انه نكره ولا شيءً !!.......الكثير من ال(لم) و ياليتني يوماً اعرف إجابه......فلتحيا العقول الكبيره التي مازلت قادره علي العيش و التآقلم رغم هذه العقول المريضة.....أتمني أن تعوا أننا خلقنا لنكمل بعض و ليس لنقضي علي بعضنا الآخر و أن هذه الدنيا ليست إلا محطة مؤقتة ....فلم نفعل كل هذا من أجلها .....

من هي رابعه العدويه ؟

طيب نبتدي كده بسم الله الرحمن الرحيم :)) هقولكوا قصه رابعه العدويه حسب مسمعتها من جدتي يعني :))يقال انها أسطوره و ليست حقيقه ....رابعه دي تبقي بنت يتيمه في العصر العباسي الأول..... بس يبقي صوتها عذب و حلو بشكل جبار تُطرِب إليه الآذان.....يتولى رعايتها رجُل عنده زي كباريه كده( مش عارفه اسمه ايه زمان) فيشغلها عنده عشان صوتها و يحببها في الخمره بقي و حياه الترف و يخليها مطربه مشهورة جداً.....المهم في يوم من حياتها هتكون ماشيه في حته فاضيه و تقابل شيخ اسمه جهم بن صفوان(هو صاحب فكره التصوف و الزهد الشديد و جيه لفظ "التصوف" من اسمه "صفوان") و يكون عطشان جدا....فيطلب منها انها تسقيه ....هتقولوا معيش الا خمره يتشربها يتفضل عطشان في الحر و محدش هيجيلك هنا ....رفض و هي فضلت مصره انها متديهوش الا خمره و هو ثابت و مصمم عالرفض ..... هتستغرب جداً لاصراره و تسئله ليه هو كاره الخمره وازاي عنده إيمان قوي كده ده هيموت تقريباً من الحر و العطش....هيبتدي يكلمها عن الدين الإسلامي و عن سماحته و إن ازاي الخمر بيذهب العقل و حرام و يقنعها انها ليها في دخول الإسلام حياه افضل.... هتقتنع فعلا بكلامه و هتحس إنها لو استخدمت صوتها العذب في ترتيل القرآن و بعدت عن حياه الترف و الفسوق دي حياتها هتبقي احسن ....و دخلت رابعه العدويه الإسلام و كرست حياتها لدينها بعد ما كانت كلها لللهو و الغناء ، وكملت الشق التاني من حياتها في العصر العباسي الثاني وكانت دايما بتشعر بالذنب الشديد تجاه ماضيها.....و بالفعل اتسمي الميدان علي اسمها و شهد بعد كده كل الأحداث المهوله دي كلها  .....شكرا جدا لحسن إستماعكم :) كان معكم قصه رابعه العدويه و يقال إنها أسطوره و الله اعلم برضه

....سلام عليكم :))

خواطر ليلية......

بسم الله الرحمن الرحيم :))

هتقابل اللي يحسسك انك ملك و هتقابل اللي 

هيحقرك و يحسسك انك بتعبك ده ولا تسوي بس في الأخر هتشيل جميله للأتنين......الأول خلاك مغرور فشوفت نفسك و بطلت تتعب و التاني فوقك و حسسك بقد ايه انت تافه و مش مهتم و أداك درس انك ازاي حقيقي تقدر نفسك و تتعب من غير متاخد مقلب و تسعي اكتر "رحم الله إمريً عرف قدر نفسه"

سعات الكتابه بتبقي أحسن علاج للخروج من مشاكل الدنيا و سجونها الغير الواقعيه!!

انها المشاكل و المتاعب التي تربطنا جميعا و انها طريقه حلها و كيفيه التعامل معها هو ما يفرقنا تماماً!!!

طب مأصلاً عادي ....إحنا اصلاً كده.....نمسك في المشاكل و نتبت فيها.....نكره كل حاجه من حولينا و نتجنب الفرحه ايً كانت و نرجع نقول ضيعنا حياتنا في ايه و احنا دايما السبب.....

Right now .....you are holding your phone ...your mind is sinking in the words or pictures of Twitter.....Facebook posts ....chatting with your besties on whats app but at what point during these things at a sudden you remember your only reason behind putting yourself in that situation and keeping yourself busy....u start thinking how truthfully you can't forget though you are that busy....you are just thinking that trouble is chasing you and always will be.....

فللأصدقاء و الأهل اهميه عظمي في هذه الحياه.....فالأهل هم الحائط الذي نتكئ عليه في اي وقتً شعرنا بالضيق او الهزيمه في حرب الحياه عامه!!......و الأصدقاء هم الامل الذي يبعث في نفسك الثقه و السرور بعد كل عائق و يجعلوك حقيقي تعي ان مشاكلك هذه تعتبر نكره بجانب مشاكل آخرين ....

 That sweet time we ruin after praying fajr when you have a silence that suddenly turns to the most awful noiae ......waiting for the sun to rise and you are just thinking of the new day that is coming and connecting it to your past with your thoughts.....you just don't know if you will sleep or somehow it will be a burden of awful thoughts ruining thatnew day that is about to start......

مشكلتنا ان إحنا واقفين لغيرنا علي الواحده و الغلطه و ناسيين ان احنا بشر و دي طبيعتنا و ربنا خلقنا كلنا كده......بنتضايق من غلططنا فبنمسك في غيرنا ونحسسه انه هد الأهرامات التلاته اللي شهرانا كمصر غير الإشتباكات و المظاهرات يعني .....ما علينا و خدها كنصيحة صغيره......لو كان ذنبك ايه بس انت ندمان عليه و رجعت لربنا اللي الناس ناسيه انه بيسامح و سايب باب التوبه دائماً مفتوح و ان رحمته دي مفيش في متسعها فعلا.....حتي لو الناس قرفتك بذنوبك القديمة و مشاكلك....طالما انت ندمت و اتعلمت و فضلت دايما في طريقك للصواب و مع ربنا يبقي طز في الناس اللي ناسيين اصلا ان دي طبيعه بشر و ان كلنا واحد و لازم نغلط عشان ببساطه ندوق ونحس برحمه ربنا علي حق  :)) ' (۞ وَمَا أُبَرِّئُ نَفْسِي ۚ إِنَّ النَّفْسَ لَأَمَّارَةٌ بِالسُّوءِ إِلَّا مَا رَحِمَ رَبِّي ۚ إِنَّ رَبِّي غَفُورٌ رَحِيمٌ)

stick to ALLAH and your good morals whatever happens and what ever craps people say!! 

كفايه خواطر كده :') سلام عليكم :))

البشر الكسالي الطماعون !!!

بسم الله الرحمن الرحيم.....سوف اطرح سؤالاً بسيطً و نري كيف ستكون إجابه الجميع......"هل حقاً نحن نعيش حياتنا بمعني الكلمه؟" هل نحن نقدر و نعي قيمه اللحظه ام نحن فقط كائنات ممله و طماعه هدفها الرئيسي هو معرفه ما بعد و إهمال الحياه بكل ما فيها!!!نعم نحن دائماً منشغلين نحن دائماً نفكر في الغد في المستقبل التخلص من تلك الدراسه المزعجه....ثم التفكير في السياره الفاخره و دخول الجامعه و ثم  نسيان العربيه المعتادة و التفكير في الاستقلال و العمل.....تفكير تفكير!! .....هذا التفكير الذي دائماً يقتل و ذلك الطمع و النفور من الحاضر الذي هو واقع!!!فلم نحن هكذا لم نحن منشغلين بالتفكير في أحسن حياه بينما هي بين إيدينا و نحن فقط ندعي إنها مفقوده!!!......هل بسبب الواقع المؤلم الذي نعيشه و نريد التخلص منه  !!!! نحن نفكر و نفكر و نفكر حتي نقتل حياتنا بإيدينا.....نعطي المستقبل و الماضي تلك الأهمية العظمي ففي الأول نرسم الحياه الورديه التي نتمناها و في الثاني نفكر فيه  التفكير القاتل الذي معه يقتل كل ما هو جميل في حياتنا .....فعجباً لنا أيها البشر!!! لم لا نعطي الحاضر جزءًا ولو  بسيط و لكن نحن نحب التخيل و التخيل حتي نعطي انفسنا ذلك الوهم فنصتدم بالواقع.....غير مدركين انه يمكننا تحقيق هذا الوهم الذي نحلم به  ببعض الاهتمام بالحاضر و التعلم من أخطاء الماضي و بذلك نرسم ذلك "المستقبل" ولكن مع الطمع و التفكير دون التعلم و الجد و التعب فأهلاً بك في عالم الإحباط و الخيال!!! .....فلا تفكروا كثيرا و لا تيئسوا ولا تعقدوا الأشياء فالحياه بسيطه و نحن من نتوهم بتلك الحواجز و القيود و نضعها لأنفسنا فنمنع انفسنا من الاهتمام بالحاضر و نفرض علي انفسنا الماضي المؤلم و نتفاجيء بسرعه الحياه و الوقت الذي هو دائماً خداع لنا و يمر كالريح واضعنا في وهمً "انه لن يفني أبدًا" .... انه نحن حقاً من كنا نفكر في وهم أخذ مننا الوقت و منعنا من تحقيق "المستقبل المرجو حقاً"!!التفكير في الماضي مؤلم ولا فائده منه ولكن التعلم منه و عدم ربطه بحياتنا من الجانب الذي يضر هو الاحسن!!...و لكن الطمع و عدم الصبر يفسد الأفكار و اليقين و يجعل مننا كائنات جائعه لا تشبع ابداً بما كتبه الله ولا تحاول التعلم و الإستفاده و العمل نحو الأفضل!!....نعم الإنسان طماع و غير صبور بالمره و تأكيداً  هي نقرأ هذه الأيه :بسم الله الرحمن الرحيم: " فَاصْبِرْ لِحُكْمِ رَبِّكَ وَلَا تَكُنْ كَصَاحِبِ الْحُوتِ إِذْ نَادَىٰ وَهُوَ مَكْظُومٌ

لَوْلَا أَنْ تَدَارَكَهُ نِعْمَةٌ مِنْ رَبِّهِ لَنُبِذَ بِالْعَرَاءِ وَهُوَ مَذْمُومٌ فَاجْتَبَاهُ رَبُّهُ فَجَعَلَهُ مِنَ الصَّالِحِينَ"

"الصبر" "اليقين ان كل ما هو آت من الله احسن".....و لكن مع الجد و العمل و الإهتمام وليس النفور من الحاضر و تركه بعيدا و عدم الصبر علي ما هو آتً و العمل عليه.....فماذا حدث لسيدنا يونس -عليه السلام- بعدما مل و زهق من قومه و دعوتهم...لم يصبر و نفر منهم و قرر الرحيل من نفسه و لكن ماذا كان مصيره  المؤلم مع الحوت و كيف لاحقا ان الله لم يخذله عندما إستعان به و هو في جوف الحوت!!...الخلاصه: أنت من تتوهم و أنت من تصنع تلك الأوهام و القيود و ترفض الواقع وبل ترفض العمل عليه نحو الأفضل ....لكن اذا صبرت و استعنت بربك و عملت بجد و إخلاص نحو تلك الأهداف فسوف تحظي بذلك "المستقبل" المرجو و لكن كفاك تفكيراً و ابدأ رحله العمل ...سلام عليكم

أبشع و أجمل ما نشترك فيه جميعا !!

بسم الله الرحمن الرحيم...هذه المره سوف تكون تكميل جزءًا من مدونه سابقه ان شاء الله ....انه تكميل لأبشع شيء في هذه الحياه.....فما اجمل هذه الحياه و ما أبشعها!!!...نعم فالحياه حافله بالمشاكل و المصاعب و أيضاً باللحظات التي لا تعوض في سعادتها ... هي بنا نتخيل ما سوف تكون إجابه هذا السؤال اذا طُرح "هل الحياه صعبه؟" ......نعم الحياه صعبه و لكن لا يكون السؤال هكذا.... إذا كانت الحياه صعبه فلم المصاعب و لم المشاكل التي تودي بحالتنا و انفسنا إلي الأسوأ؟؟.....نعم فلتلك المشاكل البشعة و لتلك المواقف المهوله التي دوماً نتمني محوها من ذاكرتنا إلي الأبد اهميه عظمي و كبري......فمن دون تلك المشاكل لا طعم للنجاح ولا طعم للحياه!!! نعم فما قيمه النجاح من دون تعب و مشاكل و إصرار .....فلنفكر سوياً و بهدوء ......جميعنا مشترك في كرهه للمشاكل و الحزن و جميعنا و بشده نتمني  حياه هنيءه سعيده بدون مشاكل و حرن و حافله براحه البال ،و لكن ببساطه كيف سنعرف قيمه راحه البال بدون هذا الكاءن الوحشي الذي يُدعي المشاكل!!! .....كيف سنعرف قيمه النجاح من دون التعب.....فللأسف يا ساده أساس الفرحه تعاسة!!!.....تلك التعاسة المكروهه من الجميع هي الامل لاحقا ....هي الحاجز الذي نسعي دوما لتحطيمه جذاذً حتي نتحول للأحسن.....نعم المشاكل كالضيف الغير مرغوب فيه الذي ياءتي علي غفله و لكنه بكل أسف ياءتي و لا يُمكن إنكار ذلك!!!فلنكره المشاكل جميعاً لكن فلندرك أهميتها في نفس الوقت و لندرك كم هي حقيقي سبب السعاده........تذكير بسيط ......من دون هذه المشاكل لا يوجد تلك السجده الخفيه لخالقك التي تبعث فيك السكون النفسي و تحرك عن قلبك الحمول....فتجد نفسك تبكي دون سيطره و بقوه.....فما أروع هذا الإحساس !!فهذه المشاكل تجعلك تتخلص بمن هو انت له "وسيله" و تجعلك تعرف من هو الصديق الحقيقي و كم انت تساوي حقيقي له!!!انها إختبار لمدي إستعانتك بخالقك و مدي سعادتك و انفاجاءك لاحقا بكمِ النعم التي سوف يعوضك خالقك الكريم بها.....انها فرحتك بكم كنت هيناً ضعيفً يستولي عليك كاءن الحزن و يوقفك و يضعفك اكثر فأكثر يوماً بعد يوماً ،لكنك ببساطه شديده استعنت بالله و توكلت عليه و علمت قوتك المدفونه و انك لست بهينً و لكنك أقوي من اي حزن و مشاكل.....فكيف ستعرف كم انت قوي و قادر بدون تلك البشاعة و المشاكل .......فما أجملك أيها المشاكل و ما اقبحك!!!!

يعني ايه سياسه؟

يعني ايه سياسه؟......ببساطه شديده و من غير مأطول عليكوا.....السياسه دي ابشع حاجه ممكن تشوفها .....سياسه يعني إنعدام مبادئ و اخلاق....يعني تغير تفكيرك لمصلحتك.....يعني تساند شخص و تدعمه علي انه هيضمنلك عيشتك و يحسنها و هو عينه كلها علي المنصب و الكرسي و من ورا ضهرك همه ينهبك و ينهب حقك مش اكتر ......سياسه يعني خيانه

.....خيانه لحقوق ملايين و خيانه لدم ألاف....سياسه يعني تساند فلان او علان لمجرد انك استفدت ف عهده لكن الطبقه الفقيره اللي شافت الذل في نظرك تتحرق او ملهاش اي تلاتين لازمه!!....السياسه انك تقف مع اللي تسانده في حق او باطل....السياسه يعني قذارات و لعب من تحت التربيزه و خيانات و فلان يولي علان قريبه المنصب و كأن الشعب ده لعبه بيجربوا فيها!!!.....سياسه يعني متاهات و متفهمش حاجه و ان ازاي فلان اللي ماسك ممكن في ثانيه يغير في رأيه او يخون شعبه.....سياسه يعني صبرنا علي باطل انه يكمل و عارفين و متأكدين ان عمره مهيرجع حق من اللي فات و بل ممكن يبقي اسوء و يدينا بالبياده كمان......السياسه يعني نغفر لأبشع ناس افعالهم بل و نجعلهم ابطال لمجرد انهم عرضوا علينا مساعده نشيل حد شايفينوا فاشل!!.....السياسه يعني نسكت عن حق شبابنا اللي مات يوم ٢٥ اللي هما اصلا اساس الثوره و شباب غيره من قبلها في السجون اتعذب و سف المرار و التعذيب بأبشع انواعه و هنفضل للاسف ساكتين عن حق بناتنا اللي اتعروا و اتسحلوا ....و شبابنا اللي كان بس بيشجع و مبسوط و اتاخد خيانه للاسف علي ايد مصري زيه!!!.....كلنا خونه و هنفضل خونه.....يعني احط ايدي في ايد واحد كان بيساند فاسد و موافقه عالنهب و التخريب و التعذيب اللي كان بيعمله!!!......خلينا مكملين.....ادي عدد قتلانا عمال يزيد ولا احنا عارفين نجيب لحد منهم حق!!!بقينا بلد المجازر و الشتايم و الغلط و كسر القوانين و استغلال الناس للأسف!!!... شايفين ان اللي هيمسك ده ملاك و هينقذ البلد من الفساد بقي و يرجع الحق و هو كل همه الكرسي و المنصب فاهمين احنا بنسبالهم كرسي و منصب و مصالح و هنفضل للأسف كده!!!...سياسه يعني تلاقي علان صاحب القناه بيساند فلان يبقي يشتم في معارضينه و يطلعهم بأسوأ صوره طبعا غير الشتايم بقي...السياسه يعني تعد تكلم نفسك زي الحمار من كترمأنت مش فاهم حاجه ولا الناس دي اصلاًً ماشيه ازاي!!!.....هقول ايه هي السياسه كده دي خلت عبد الناصر يسمم صديق عمره عبد الحكيم عامر ....يبقي مش هتعمل فينا احنا كده........ربنا يستر علينا....

هل يعقل ان يغيب الشهر الكريم عن انظارنا؟!!!

بسم الله الرحمن الرحيم ده تاسع بلوج ليا ان شاء لله و هيكون باللغه العربيه الفصحي ان شاء الله ...ربنا يستر :')...و سوف تكون البدايه بهذه الايه الرائعه من سوره البقره: بسم الله الرحمن الرحيم :شَهْرُ رَمَضَانَ الَّذِيَ أُنزِلَ فِيهِ الْقُرْآنُ هُدًى لِّلنَّاسِ وَبَيِّنَاتٍ مِّنَ الْهُدَى وَالْفُرْقَانِ فَمَن شَهِدَ مِنكُمُ الشَّهْرَ فَلْيَصُمْهُ وَمَن كَانَ مَرِيضاً أَوْ عَلَى سَفَرٍ فَعِدَّةٌ مِّنْ أَيَّامٍ أُخَرَ يُرِيدُ اللّهُ بِكُمُ الْيُسْرَ وَلاَ يُرِيدُ بِكُمُ الْعُسْرَ وَلِتُكْمِلُواْ الْعِدَّةَ وَلِتُكَبِّرُواْ اللّهَ عَلَى مَا هَدَاكُمْ وَلَعَلَّكُمْ تَشْكُرُونَ(185)....و بعد هذه الزحمه من الاحداث المهوله و العظيمه في مصر حان الوقت لكي نتذكر ذلك الشهر الكريم.....ذلك الشهر الذي لم ينل منا اي اهتمام  للاسف الشديد هذا العام.....ذلك الشهر الكريم  الذي نترك فيه آلامنا و مشاكلنا جانبا فنلتقي بجانب اخر و تنفتح اعييننا علي اجمل جانب في هذه الحياه و تظهر فيه الصفات الكريمه داخل كل شخص منا و تظهر تلك الفرحه المدفونه ......فنجد الشوارع ترقص من فرحتها و هي مزينه بالفوانيس و نجد فيها همه الشباب في تعليق تلك الزينه  الي تبعث الفرحه في قلوب الجميع سواء كانوا كبارا ام صغارا.......نري الفرحه في عيون الصغار و هم يشتروا الفوانيس مع اهاليهم في الشوارع و لعبهم بها مع الجميع حتي تكتمل فرحتهم....ذلك الشهر الكريم الذي نقترب فيه اكثر الي ربنا الكريم فنلقي باثقال الحياه بعيدا و نظل منهمكين في القرآن الكريم و الدعوه الي الله  والاحباب......السحور وسط الاهل و الاصدقاء و شرب المياه بجنون و فجع قبل  صلاه الفجر حتي لا نعطش  (وبنعطش برضه مفيش فايده فينا :))).......الفرحه الشديده و الاطمئنان ان الشيطان مقيد بعيدا......لبس العبايات و الجلاليب و الذهاب الي التراويح سويا حيث الاحساس براحه نفسيه عند سماع الايات الكريمه و الصلاه و  السجود ...الاحساس بالسعاده و الفخر لقرأتك القرآن بكثره وكل يوم وكم انت عظيم امام ربك و نفسك لأنك ختمت القرآن مره او اكثر (وانت و شطارتك بقي :)) .......يدوي صوت طبله المسحراتي فتبتسم ابتسامه خفيه و تنبعث فيك الفرحه فتنهي ما بيديك ثم تذهب متسرعا توقظ اهلك و ان امكن اصدقاءك فتشعر بسعاده التجمع و السحور سويه........انهماك الامهات الفاضلات في طبخ الاكل المفضل للجميع و حرصهن و بكل حب علي ارضاء الجميع و تفننهن في ملأ اطباق الجميع علي الافطار حتي يكادوا ان ينفجروا من كثره الاكل.....انها استعجال كل اب فيما قبل الافطار و هو ذاهب لكي يشتري عصير السوبيا و التمر و الكركديه و صينيه الكنافه الحافله بالجبن و تلك القطايف اللذيذه التي نفتقدها كثيرا بعد رمضان,فبقبل الاذان بخمس دقائق نجد الاب متسرع لكي يلحق اهله بينما يقابله مجموعه من الشباب المتعاون الذي يوزع التمر و العصير علي جميع السيارات حرصا منهم علي اطفاء عطشهم وقت الاذان و اشعال الفرحه البسيطه في قلوب الماره.....ذلك الشهر الذي يأتي فيه الجميع من العائله من جميع الاماكن و البلاد حتي يتجمعوا في بيت العائله الكبير حتي يكونوا سويا علي سفره واحده يغمرهم احساس الوحده و اللمه و الفرحه بتجمع العائله سويا و اخيرا  .....انه الاحساس بالفقير المسكين و بعث الفرحه في قلبه عن طريق موائد الرحمن التي تجعل الشوارع تنير و تتكلم من فرحه الفقراء فيها فنجد الشوارع تحولت من مصدر تعاسه الي سعاده بنسبه للفقراء...انها فرحتك بالعمل التطوعي حتي لو كان بسيطا و فرحتك عندما تفطر مع اصدقائك والفقراء  في نهايه ذلك اليوم الجميل الذي لن يطمس من ذاكرتك مهما حدث......عن البطه اللذيذه اول يوم في كل بيت مصري و فرحه اهل البيت كله بها ..انه الشهر الذي تعلم فيه كم كنت مفتقد القرب من ربك و كم انت كنت في احتياجه فجاء رمضان لتجدد عهدك مع خالقك....الكلام عن رمضان و كم هو ممتع ليس له حدود فهو ذلك الاحساس بالفرحه المشتاقه من قبل الجميع......انه رمضان ايها المصريين امن الهين عليكوا ان تنسوا شهر بهذا الروعه و الجمال؟؟؟؟...اعيروه اهتماما فهو علي الابواب ...انها الفرحه الحقيقيه ....اللهم بلغنا رمضان سالمين باءذن الله و اجعلنا اقرب اليك يا الله و احفظ هذه البلد من كل شر و سوء :))       

كلمتين نفسي اقولهم من زمان......

بسم الله الرحمن الرحيم بقالي كتير مكتبتش :') بس هقول كلمتين كده نفسي اقولهم من زمان عن مصرنا اللي مش يتتغير ولا بتتقدم دي :').....عايز بلدك تتغير ازاي و انت نفسك مش عايز تتغير....اه مش عايز تتغير و هقولك ازاي انك انت اصلا مقتنع انك الصح و البلد و اللي فيها هما السبب بس قبل اما اتكلم محدش بس ينسي الايه دي من سوره الرعد:)) : بسم الله الرحمن الرحيم: "إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنفُسِهِمْ" صدق الله العظيم     

لسه بترمي زباله علي الارض و مش مدي احترام ولا اي اهميه للعامل البسيط الغلبان اللي بيلم وراك و انت عمال ترمي كمان و كمان لا و العجيب بقي في الامر انك بتشتكي من كتر الزباله و هي اصلا بتيجي منين و بتلعن في عمال النظافه اللي مش بيقوموا بواجبهم حسب وجهه نظر سعتك!.....اصلك هتموت مثلا لو رميت في سله المهملات لازم ترمي علي الارض و من شباك العربيه عشان ضميرك يرتاح!!!!.........تعصبك و عدم احترامك لاراء غيرك و خناقك مع اللي حواليك و خصوصا في السياسه .....فعلا مبقاش فيه احترام لرأي حد و الناس ماشيه بمبدأ رأيه مش زي يبقي هو عدوي خلاص و خناق بقي و صوت عالي و تقريبا كده اداب الحوار دي اتعدمت و الناس نسيت ان"اختلاف الراي لا يفسد للود قضيه".......سواقتك في الشارع و انك لازم تشتم و تزمر و تعلي صوتك وممكن كمان تنزل تتخانق و تاخد في سيءات اكتر و تضايق اوي و تقول الناس هما الغلط!!!! .....طب بزمتك انت كام مره كسرت الاشاره،كام مره ركنت صف تاني،كام مره دخلت عكس اتجاه،كام مره مشيت فوق السرعه المسموحه ...ابقي احترم قوانين بلدك الاول بعدين اتكلم!!......عايز بلدك تتغير ازاي و انت مش مدي احترام لبنات بلدك .....و الله عيبه في حق رجاله البلد لما كل بنت ماشيه في
 الشارع(حتي لو لابسه شوال!!!!) تبقي ماشيه هتموت من الرعب و الخوف ان حد يعاكسها او ان حد يضايقها بكلام مفيش ابشع منه و هي مش قادره ترد بل و مش لقيه حد تستنجد بيه.....قولي كده لو اختك اللي اتعاكست و كلمتك منهاره ان حد ضايقها في الشارع هتعمل ايه؟؟؟متقولش هتتعصب و تتنرفز بقي و الدور ده م انت اصلا بتعمل كده...... تحس علي دمك بقي و تحترم نفسك و تغض من بصرك و تحترم بنات الناس..........طب بلدك هتتحسن ازاي و انت لحد اللحظه دي بتعلي صوتك و بتقل ادبك علي اهلك و لا فيه عندك اي احساس بقد ايه هما تعبوا و بتزعق و فرحان اوي من نفسك .......بتشتم و الشتيمه ايه ملازمك كل مره بتتكلم فيها و فرحان اوي انك تعرف شتايم كتير و بتشتم اي حد لا و بالام كمان!!!! و الخوف من ربك اتعدم!!!!!......عايز بلدك تتغير ازاي و انت بتعصي ربك و مش بتصلي و لا حتي بتحاول تغير من نفسك و من شخصيتك دي.....عايز بلدك تتغير ازاي و انت رافض الاعتراف انك غلط و رافض مبدأ أن الكمال لله وحده و مصمم انك الصح و عبقري زمانك!!!!......من الاخر مفيش حاجه هتتغير الا اما الناس نفسها تتغير متشتكيش و تقول ليه فيه مشكله و مفيش حل و انت اصلا سبب و عامل اساسي في المشكله دي!!!!....ربنا يهدي كل الناس و كل من ضل سبيله ......يارب ساعدنا و عينا  نتقدم ببلدنا :)) .....قولوا امين ان شاء الله :)) سلام عليكم :)

ساعات من يومي!!!

بسم الله الرحمن الرحيم اول مره بجد مش عارفه ابتدي منين ولا عارفه هتكلم في ايه بس مجرد احساس جالي بعد اللي مريت بيه الكام ساعه اللي فاتوا......هقولكوا بقي امبارح فجأه كلمتني صحبتي و قلتلي هنعمل مشروع و هنروح للايتام ....طبعا الموضع جه بسرعه بس الحمد لله.....خرجنا من المدرسه بدري و مبسوطين و رايحين للايتام و اول اما وصلنا شفت منظر مش هيكرر ....شفت اطفال مبسوطين و فرحانين جدا و الابتسامه من الودن للودن و بيرقصوا و كأن الحياه وردي...فكرت شويه كده و قلت عمتا احنا بنزعل و نعيط و نضايق علي حاجات مفيش اتفه منها و بصيت الاطفال و كنت عادي مش بضحك و مبوزه لقيت ولد صغير راح باصصلي وضاحك و كأنه بنظرته و ضحكته دي بيقولي بلاش تشأوم ونكد مفيش حاجه مستهله .....كانوا فعلا مبسوطين و من القلب و مش احنا اللي قوامناهم هما اللي كانوا بيشدوا اصحابنا الولاد يرقصوا معاهم و ضحكتهم كانت فعلا صافيه و من القلب ..... مكنش فيه زي فرحتهم رغم ظروفهم دي كلها!!!......المهم حبه جه بقيت اصحابنا من المدرسه و لقينا واحد زميلنا مكشر و مهموم,سألناه مالك .....قلنا اصعب حاجه فعلا ممكن تتقال ....مدرسه عندنا ابنها عنده 4 شهوور و كان ما شاء الله امور اوي ,للاسف الشديد مات!!!....نزل الخبر علينا كالصاعقه....متخيلين ام فضلت رحله لمده 9 شهور مع حته منها و بعد اما الرحله دي تخلص باربع شهور ....الولد يموت و يسبها لوحدها!!.....ام سابت ابنها زي الفل في حضانه الاطفال الصبح ....جت في اخر اليوم تصحيه لقته لونه ازرق وجثه هامده.... اكيد مفيش حاجه اصعب من كده!!!!......الخبر فعلا كان صعب ....خدت لحظه كده و افتكرت بنت شوفتها مع امي من اسبوعين بظبط.......ماما واقفه بتركن العربيه و بتفتح الباب و نازله لقت بنت شكلها يدي 6 سنين مش اكتر وشها ده ما شاء الله زي القمر و شكلها نضيف و متسرحه و ضحكتها واخده وشها كله و علي قد اما وشها كان منور علي قد اما كان متبهدل ضرب و خدوش .....اول سؤال ماما سالتهولها انتي اسمك ايه؟ ردت الطفلة و بكل برأه و امل و تفأول انا اسمي فرح و بعدين ماما سألتها وشك ماله متبهدل ليه يا فرح ......ردت البنت بأوجع رد و سبحان الله بنفس الابتسامه الصافيه و قالت: ابويا ضربني عشان بجبله فلوس قليله كل يوم!!! امي اتصدمت و انا كمان و سألتها انت مامتك فين و شوريتلها عليها .....و مشيت فرح ,مشيت و هي سايبه فينا افظع حاجه ممكن نتخيلها....طفله سنها مش جايب 6 سنين تتبهدل كده من والدها عشان الفلوس!!! اسمها فرح و عمرها مشافت الفرحه في حياتها!!فلترقد الانسانيه في سلام..........اكملكوا بقي قعدت كده افكر و زعلت اكيد ....فكرت في الثلاث مواقف و قلت ياه ده ربنا كريم و الواحد لازم كل ثانيه يقول الحمد لله......تخيلت حال الام اللي ابنها كان في ايدها بيضحك و بعدها بكام ساعه رايحه تدفنه في القبر....يارب الام دي تحط غي دماغها ان ممكن يدخلها الجنه و ان ابنها نفسه في الجنه ان شاء الله ....... فكرت في فرح و يااه علي التفأول اللي في وشها و هي متبهدله و متعوره كده و قد ايه الابتسامه مش مفارقه وشها.....فكرت في كريم الطفل اللي في دار الايتام و الولد اللي ضحك في وشي و انا مكشره ......تصدقوا احنا فعلا تافهين!! احنا بنزعل علي حاجات ولا تستاهل و بنعيط و ننكد علي نفسنا و للاسف عمرنا متخيلنا او عرفنا احساس شخصيه من الشخصيات دول.....يارب نتعظ و منقفرفش في نفسنا و نشكر ربنا كل لحظه انه عافنا مما ابتلي بيه غيرنا و ان قد ايه الحياه صعبه للناس كلها و محدش احسن من حد .....يارب فك كربه و ضيق كل شخص...قولوا امين ....كنت مضايقه مش اكتر و حبيت اوصف الكام الساعه اللي فاتوا دول و قد ايه فرقوا معايا ....سلام عليكم

هو احنا ليه بنشتم؟

بسم الله الرحمن الرحيم .....دي سادس مدونه ليا,ان شاء الله تعجبكوا هاتكلم عن عاده و ظاهره للاسف الشديد انتشرت بين الناس و ده موضوع مهم اوي... مش هطول عليكوا .....الحاجه دي هي الشتايم .....السؤال بقي هي الشتايم ديه جت ازاي اصلا؟ .....هقولكوا بقي طبعا من زمان او من ايام الصحابه و ايام الجاهليه كان عندهم شتيمه وهي (ثقلتك امك) معناها ان الام اولادها يموتوا و انك بمعني اصح تموت......طبعا دي شتيمه بسيطه لشتايم اليومين دول.....كفايه رغي بقي و نخش في الموضوع ايام زمان او مش زمان اوي كانت ابسط الشتايم بتبقي بمعني الغباء زي مغقل و حمار.....الخ و كانت حاجات بسيطه بس برضه ميصحش تقولها.....فجأه بقي كده و من حيث لا تدري ظهرت افظع شتايم ممكن تسمعها و كفايه معناها البذيء و اللي بقت حاجه زي اللبانه علي لسان كل شاب و فتاه للاسف......كل الشباب او الناس عمتا بقت عادي عندها انها بتشتم بالام و الاب و افظع الشتايم كمان لا و ايه حطوها معيار للرجوله!!!.....ندي كده كام مثال .....واحد سايق عربيته و واحد زنق عليه بالعربيه او خبط خبطه بسيطه او اي حاجه تقوم فجأه تلاقي شتايم فظيعه و بالاب و الام و كل ده بسبب خبطه بسيطه!!! .....مثل تاني واحد عمال علي بطال عمال يشتم علي تويتر اي حاجه يشتم مبسوط زعلان لازم يشتم و مش اي شتيمه كمان لا وايه ما شاء الله تلاقيه قموس شتايم و فخور بكده!!! موقف تالت كمان اصدقاء بيلعبوا ماتش كره او حتي ماتش بلاي ستايشن جرب بس تعدي كده و تشوفهم و تسمعهم و هما بيلعبوا .....هتسمع افظع شتايم و انت مشوطش الكره ليه يا**** و هاتك يا شتايم بقي تعالوا كده نحكم علي التلاته .... يعني انتوا شتمتوا في حاجات ملهاش اي لزمه ولا ليها اي اهميه انت ياللي عربيتك اتخبطت شتمت اللي قدامك هاه قولي عربيتك اتصلحت؟؟ طب كان هيجري حاجه لو كنت قلتله معلش و ربنا يعوض علينا خير و لو كنت اتصرفت بحسن اخلاقك كان ربنا فعلا هيردهالك خير.....الموقف التاني انت ياللي بتشتم و مبسوط بنفسك اوي و فرحان تقدر تقولي موقفك لووالدك او والدتك شافوا الاكونت بتاعك يا فرحتهم بيك بجد بتشتم و بتتشتم بالام و الاب وانت ولا فرقه معاك طب انت خايف من مامتك و باباك مش خايف من ربنا اللي خلقك!!!! عيب عليك والله ....الموقف التالت و هتكلم عن الماتشات عمتا هي حاجه حلوه اما نعد نشتم؟حتي في الماتشات الكبيره تلاقي الجمهور بيشجع و هو بيشتم زي اما يكون هيجراله حاجه لو مشتمش!!و بعيد عنك مش اي شتايم.....شتايم الواحد بس يخجل و يشعر بالخزي و العار قدام ربه لمجرد انه عرف معناها .....يعني هو انت اللي شتمت و انت بتلعب ربنا هيوفقك مثلا ,ولا الجمهور هي دي طريقه تتمنوا بيها الفوز.....لو فاكرين ان الفوز او الكاس او حتي نتيجه ماتش عادي بين الاصحاب هتيجي  بالشتيمه!!يبقي انا اسفه عندكوا ضعف و نقص في الشخصيه و الايمان عندكوا منعدم تماما!!!.....عارفين ايه المشكله؟؟ ...انها بقت حاجه عادي و بقي الراجل معروف انه لازم يشتم و الخوف من ربنا اتعدم لا و كمان البنات بقت وخداها موضه و عماله شتايم  يا فرحتي بيكوا يوم القيامه حتي الحياء انعدم!!! زي خيالات غيرعاقله تقولك انا همسك لساني بس لو حد شتمني بامي او بابي هرد عليه و بأسوأ كمان.....طب معلش كده اللي شتمك عنده نقص تقوم انت توطي اسلوبك و مستواك عشان تبقي ناقص زيه؟؟ ليه متقولوش ربنا يسمحك و هتتردلك و كما تدين تدان و فعلا لو عملت كده ربنا مش هيسبلك حقك.......هتقولي هبقي مش راجل وسط اصحابي....هقولك طب يا حبيبي يا بتاع صحابك وريني يوم القيامه كده وانت ربنا بيسألك انت شتمت ليه فهتقولوا عشان ابقي راجل....وريني بقي الرجوله سعتها و قولي كده اصحابك فادوك بأيه؟؟؟.......طب انت يا ابن الحلال اتعودت انك تشتم فاي موقف حصلك وحش و تشتم و بضمير كمان .....طب اذا كنت انت متعود علي الشتايم يبقي قبل اما تموت هتقدر تنطق لا اله الا الله!!! ليه متحطش في دماغك انك اول اما تحصلك حاجه وحشه تقول استغفر الله العظيم او قدر الله و ما شاء فعل....اه نسيت هتقولي منظري قدام صحابي...شوف و انا اللي بقول.... وريني بقي يا حبيبي منظرك و انت بتتعذب في نار جهنم عشان حبه كلام ولا يسوي .....عارف انت اما تتشتم كده و تشتم كده بالاهل ,يعني بتبقي انت كده بتلغي شخصيتك و بتحقر من نفسك لان ببساطه شديده الناس عارفه انك موءدب و ماسك لسانك فعمرهم مهيقدرواحتي يقولولك حتي ربع كلمه ....يعني من الاخر انت بشخصيتك سواء كويسه اوسيئه بتحدد معامله الناس معاك فالله يخليك حافظ علي كيانك و شخصيتك و ارحم نفسك شتايم و خليك مثل اعلي .....طب نقول مثلا انت كويس و محافظ علي صلاتك تقوم تشتم بعدها؟؟...انت هتبني بيت وتتعب فيه و بعدين تجيب ونش يهده.ياريت متنساش الحديث ده و تلحق نفسك احسنلك  روى مسلم " ليس المؤمن بالطعان ولا اللعان ولا الفاحش ولا البذيء......الخلاصه: احنا كلنا بنشتم و اتعودنا للاسف بس لرحمه ربنا علينا كلنا ان فينا اللي بيقدر يمسك لسانه و يتصرف و يفكر نفسه انه مش هيضيع جنته عشان كام كلمه .....اهو نفسي بقي اللي عمال يشتم ليل و نهار ده يفكر نفسه بكده و ان قد ايه عذاب جهنم صعب ....طب انت ياللي بتشتم لو مت مثلا و الناس مثلا فتحوا التويتر بتاعك و لقوك بتشتم كده .....ايه هيكون انطباعهم ....من الاخر خلي منظرك قدام ربك و نفسك ووالديك و الناس لائق .....شايف انها رجوله و بتقول منظري و لازم ارد الشتيمه يبقي انا اسفه انت شخص عنده نقص تام و بيضيع و بيقضي علي جنته و علي شخصيته!!! ......طب انت اب و بتشتم بس مش قدام ولادك ولا اهلك لكن قدام صحابك عشان تمشي معاهم و تبقي زيهم....لا الصراحه اثرت فيا و خايف علي ولادك اوي .....طب ايه ربنا نسيتوا!!! خليك مثل اعلي لدرجه ان اصحابك يتكسفوا يشتموا قدامك.....انا عارفه انها صعبه انك تبطل تشتم بس ببساطه كده شتمت في سعتها استغفر ربنا و فكر نفسك بعذاب جهنم و فكر و انت بتجاهد ضد نفسك قد ايه ربنا  هيقف معاك و هتلاقي سبحان الله ربنا بيسهلهالك و لسانك هياخد علي الاستغفار بدل الالفاظ البذيئه و خلي بالك انت كده فعلا هتبقي راجل و ماشي بمبدأ الرجوله صح و شخصيتك هتتغير 100% للاحسن ان شاء الله:).....هتمشي مع اصحابك و مع مفهوم الرجوله الخاطيء هتنعم بافظع عذاب و متنساش  فيه ملكين علي يمينك و شمالك و اللي علي يمينك الحمدلله فاضي مفيش وراه حاجه لكن الشمال يا عيني عليه عمال يكتب!!! و خلي بالك عذاب ربنا عظيم و اسمع كده الكام ايه دول من سوره(ق

إذ يتلقّى المتلقّيان عن اليمين وعن الشّمال قعيد17 ما يلفظ من قول إلّا لديه رقيب عتيد18   وجاءت سكرة الموت بالحقّ ذلك ما كنت منه تحيد19 .......طيب يعني تخيل كده لو مت و انت بتشتم ,حاجه صعبه صح؟ طب انت بتخاف لو والدك او والدتك شافوك بتشتم طب بالنسبه لربك اللي هو خالقك انت ووالدك ووالدتك!!!.....ياريت تهتم بجنتك و تمسك لسانك شويه و متضيعش حاجات كتير من ايدك عشان كام كلمه معناها فعلا ميسواش اي حاجه غير قله قيمه و هقولها تاني انت اللي بتحدد الناس تحترمك ازاي,شايف ان الشتيمه رجوله و مبسوط اوي ابقي قابلني لو فلحت في دنيا او في اخره......الحق نفسك و امسك لسانك و استغفر ربك ,حد شتمك هتتردله مش لازم تشتم,غلط فيك بوالدك اوبوالدتك عشان هو عنده نقص تقوم انت ترد و تبينله انك انت كمان عندك نقص!!!عارف انت اما تسكت و تقوله ربنا يسامحك يبقي كده اولا بترضي ربك و ثانيا بتبنله ادبك و حسن اخلاقك لان ببساطه كل اناء بما فيه ينضح.....افتكر رضا ربنا و جنتك و احترام الناس ليك و انك تمشي بمبدأ الرجوله صح!!.....انا خلصت:).....يارب الشتايم تتعدم خالص و الناس تحترم نفسها و تفتكر ربنا و جنتها.....ملحوظه: انا عارفه ان حال مصر في النازل بس ربنا يسترها ان شاء الله :)