سؤال وجودي كده لكل المنتجين و المخرجين؟
هو أنتوا ليه رابطين المسلسلات برمضان؟ اشمعني رمضان؟ ليه الشهر ده؟ مفيه ١١ شهر غيره؟و ليه معلش كل الممثلين لازم يعملوا مسلسلات اللي هي خلاص بقت قاعدة!!
المفروض إن الشهر الكريم ربنا مكرمنا بيه و مدينا فرصه نتغير مش ننشغل و ياريتها حاجات عدله ....
اللي يفكر يفتح التليفزيون و يقلب بس لمده ٣ دقائق
و علي الابتذال و الشتايم و الحوارات الغير لائقة اللي هتسمعها!! لا و متحلاش إلا في رمضان....
يعني عايزين تبينوا واقع مصر بينوه بعقل شويه الله يخليكوا و بطلوا الحكم بالإجماع!!
و بعدين عايزين تبينوا واقع ايه أصلا؟ مهو واقع مرير و خلاص... فيه اللي شرب منه و اللي مستهبل ومقتنع أن مصر في أزهي عصورها...هنثبت لنفسنا ايه تاني بالمسلسلات!
و صحيح كم الفلوس البشع اللي اتصرف ده و اتعمل بيه مشروع كان زمان نص شباب مصر العاطل اشتغل :')
حسبي الله و نعم الوكيل ....شوهتوا كل حاجه حلوه و سلبتوها حقها ....زمان أغلب الناس كان بتهتم تخلص في أعمالها... تتغير للأحسن.... تجري تلحق التراويح ؟ يخططوا هيختموا كام مره،يحططوا مخطط بسيط ليومهم عشات يساعدهم للتقرب من ربنا..
دلوقتي للأسف اللي -و مش كل الناس أكيد بس نسبه و بتزيد للأسف- اللي عايز يلحق مسلسل مش عارفه ايه الساعه كام و اللي عامل جدول للمسلسلات و اللي بقي ميقدرش يعدي يومه من غير ميفوت حلقه مسلسل "فلان الفلاني"...
(شَهْرُ رَمَضَانَ الَّذِي أُنْزِلَ فِيهِ الْقُرْآنُ هُدًى لِلنَّاسِ وَبَيِّنَاتٍ مِنَ الْهُدَىٰ وَالْفُرْقَانِ ۚ)
(البقرة)
هدي يعني هدايه و فرقان يعني التفريق بين الحق و الباطل و المقصود هنا "القرآن الكريم"....فياريت نعتبر و نركز علي مهنتنا الأساسية....اللهم أهدينا جميعاً و تقبل منا صالح الأعمال و اعف عن أعمالنا التي لا تليق بك....
كل سنة و أنتوا طيبين 🌙
